Пред 13 години имав срцев удар. Ме пренесоа во болница со брза помош. Дежурниот доктор ми кажа дека има две вести, една лоша и една добра. Прво го замолив да ми ја каже лошата, и ми кажа дека имам срцев удар. Веднаш го прашав за добрата, ми одговори дека добрата е што ќе се интервенира и ќе ми се помогне. Добрата вест таа вечер беше тоа што дежурен доктор беше д-р Оливер Бушљетиќ. Во 2 часот по полноќ влеговме во операциона сала. Ми вградија два стента. Кога докторот се префрли во Клиничката болница „Аџибадем Систина“, се префрлив и јас.

На лекар одам со радост

Сите се плашат кога ќе се спомне болница. Во „Аџибадем Систина“ на секој преглед и интервенција одам со радост. Сите се насмеани и позитивни. Ќе отидам болен, ќе излезам здрав. Минатата година, пред да почнам со снимањето на филмот „Ах, љубов моја“, отидов на преглед, и д-р Бушљетиќ ми кажа дека треба да внимавам и да се чувам, да не се напрегам со работа, а јас бев режисер на филм на кој работевме и по 10 часа дневно. Два дена пред крајот на снимањето ми се слоши. Бевме на снимање во Маврово од каде веднаш бев префрлен во „Аџибадем Систина“. Д-р Бушљетиќ ме оспособи за да го завршам филмот. Откако завршив со снимањето се договоривме повторно да дојдам на преглед. Тогаш ми соопшти дека морам да се оперирам и ме запозна со проф. д-р Салис Таџер.

Бев смирен и убеден дека сум во сигурни раце

Јас бев пријател со неговиот татко, проф. д-р Исак Таџер, кој беше една од најкултурните личности во Македонија. Не постоеше концерт или културна манифестација на која д-р Исак не беше присутен. Го познавав и проф. д-р Салис Таџер, кој е одличен пијанист и голем љубител на џезот. Знаев дека е најдобар за операција на срце, во што подоцна и лично се уверив. Ми објасни дека е потребно да се направат 3 бајпаса, и го договоривме датумот. Она што беше чудно е што пред операција не чувствував никаков страв. Бев смирен и убеден дека сум во сигурни раце.

Тие не се обични луѓе

Операцијата помина во најдобар ред. По операцијата, професорот ме посети и ми соопшти дека ми се направени четири бајпаса. Следните 10 дена останав на Одделот за кардиохирургија, каде имаат одлични услови. Сега редовно одам на контроли и одлично се чувствувам. Пред некој ден успеав и да се искачам на Водно. Проф. д-р Салис Таџер заврши огромна работа.

Во Клиничката болница „Аџибадем Систина“ најголем впечаток ми остави тоа што секој од вработените и докторите е голем професионалец во својот дел. Позитивната енергија што ја шират во разговорите пред и по операција ретко се сретнува. Имаат посебна харизма и посебно значење, и тие не се обични луѓе.

Ви благодарам за сè,

Никола Ангеловски