Spitali Klinik “Acibadem Sistina” edhe në sezonin e ri garues mbetet sponsor mjekësor i klubit të basketbollit MZT Skopje Aerodrom, duke vazhduar bashkëpunimin e suksesshëm shumëvjeçar dhe përkushtimin ndaj shëndetit, sigurisë dhe sukseseve sportive të basketbollistëve.

Si kompani shoqërisht e përgjegjshme, e cila në mënyrë të vazhdueshme investon në zhvillimin dhe avancimin e sportit në vend, “Acibadem Sistina” edhe këtë sezon do të ofrojë mbështetje profesionale mjekësore për basketbollistët e MZT Skopje Aerodrom, me theks të veçantë në parandalimin e lëndimeve sportive, diagnostikimin në kohë dhe ruajtjen e shëndetit të tyre.

Në prag të sezonit të ri, Dr. Mihajlo Ivanovski zhvilloi një takim me basketbollistët dhe përfaqësuesit e MZT Skopje Aerodrom, ku u konfirmua gatishmëria për vazhdimin e partneritetit shumëvjeçar.

“Jemi krenarë që edhe këtë sezon vazhdojmë të jemi pjesë e historisë sportive të MZT Skopje Aerodrom. Bashkëpunimi ynë shumëvjeçar është ndërtuar mbi vlera të përbashkëta, besim dhe përkushtim për arritjen e rezultateve të larta. Si sponsor mjekësor, detyra jonë është t’u sigurojmë basketbollistëve kujdes shëndetësor cilësor dhe të jemi mbështetja e tyre në të gjitha sfidat që sjell sporti profesional”, deklaroi Dr. Mihajlo Ivanovski.

Në kuadër të partneritetit, basketbollistët do të kenë qasje në shërbimet bashkëkohore diagnostikuese dhe terapeutike të Spitalit Klinik “Acibadem Sistina”, si dhe në ekipin profesional mjekësor, i cili do të kujdeset për shëndetin e tyre gjatë gjithë sezonit.

Nga MZT Skopje Aerodrom shprehën mirënjohje për mbështetjen e vazhdueshme, duke theksuar se partneriteti me “Acibadem Sistina” është i një rëndësie të veçantë për zhvillimin profesional dhe arritjen e sukseseve të reja sportive.

Sezoni i ri garues për MZT Skopje Aerodrom fillon të shtunën, më 26 shtator, me ndeshjen kundër Kumanovës në kuadër të Superkupës, ku skuadra bardhekaltër do të synojë ta mbrojë trofeun e fituar në pesë vitet e fundit.

Me vazhdimin e këtij partneriteti, “Acibadem Sistina” konfirmon përkushtimin e saj për mbështetjen e sportit maqedonas dhe ofrimin e kujdesit shëndetësor të nivelit të lartë për sportistët, si bazë për sukseset e tyre të ardhshme.