На Одделението за нуклеарна медицина и ПЕТ-Центарот во Клиничка болница „Аџибадем Систина“ започна да се изведува нова дијагностичка процедура NaF PET/CT скен.

Методата се базира врз примена на мала количина радиофармацевтик (натриум флуорид – F18) кој по апликација се распределува во коските. Таму каде што постои зголемена активност на коскеното ткиво се создава сигнал кој апаратот го детектира. Со комбинирање на ПET (кој ја покажува функционалната активност) и КT (која дава детална анатомска слика), се добива целосен и прецизен увид во коскениот систем.

NaF PET/CT има значајна улога во:

• откривање на коскени метастази кај малигни заболувања
• проценка на нејасни болки во коските
• следење на ефектот од терапијата
• дополнителна евалуација кога други дијагностички методи не даваат јасен одговор.

Во споредба со класичната скелетна сцинтиграфија, оваа метода обезбедува повисока чувствителност и подобра резолуција, што овозможува откривање на промените во порана фаза.

Постапката е едноставна и добро толерирана. По интравенска апликација на радиофармацевтикот, се чека одреден временски период (30 до 60 минути), по што следува снимање на целото тело кое трае кратко (околу 20 минути). Не е потребна посебна подготовка, а пациентите по завршувањето на прегледот можат да продолжат со вообичаените активности.

NaF PET/CT претставува важна алатка во современата дијагностика, која овозможува навремено откривање на коскените промени и подобро планирање на понатамошниот третман.