VËLLA DHE MOTËR TË TRAJTUAR ME SUKSES ME TË NJËJTËN DIAGNOZË

Sëmundja e Hirschsprungut, e njohur edhe si megakolon kongjenital, është një gjendje kongjenitale që karakterizohet me zgjerim të zorrës së trashë dhe kapsllëk të vazhdueshëm. Sipas specialistit të kirurgjisë pediatrike, doc. Dr. Risto Simeonov, shkaku për shfaqjen e kësaj sëmundjeje nuk është i qartë. Ajo ndodh kur qelizat nervore në zorrën e trashë nuk zhvillohen plotësisht. Nervat në zorrën e trashë kontrollojnë kontraksionet e muskujve që lëvizin ushqimin nëpër zorrë dhe pa këto kontraksione feçet mbeten në zorrën e trashë.

“Ekzistojnë disa faktorë që mund të rrisin rrezikun për shfaqjen e sëmundjes së Hirschsprungut, si historia familjare (mund të jetë e trashëgueshme dhe të transmetohet, pra nëse një fëmijë e ka këtë gjendje, ekziston mundësia që edhe fëmijët e ardhshëm të jenë në rrezik. Sëmundja shfaqet afërsisht në një në 5 000 të porsalindur dhe është 3-4 herë më e shpeshtë te meshkujt”, shpjegon dr. Simeonov.

Simptomat mund të shfaqen menjëherë pas lindjes ose më vonë gjatë fëmijërisë. Shenjat alarmuese në fazën e hershme janë: mungesa e feçes së parë (mekoniumit) në 48 orët e para, refuzimi i ushqimit, të vjella me përmbajtje të verdhë dhe bark i fryrë.

“Në ditët e para të jetës, shenja më e rëndësishme është nëse i porsalinduri nuk e nxjerr feçen e parë brenda dy ditëve. Ky është një sinjal që nuk duhet të injorohet, sepse diagnoza dhe trajtimi në kohë janë kyçe për shërim të suksesshëm dhe zhvillim normal”, thekson dr. Simeonov.

Në fëmijërinë e hershme, sëmundja mund të shfaqet me vonesë në rritje dhe zhvillim, kapsllëk kronik, bark të fryrë, të vjella ose episode të diarresë së rëndë. Një nga komplikimet më serioze është enterokoliti – inflamacion i zorrëve që mund të jetë kërcënues për jetën.

“Deri në 40% e fëmijëve me këtë sëmundje zhvillojnë enterokolit. Në disa raste sëmundja kalon lehtë, por në të tjera mund të përparojë në formë të rëndë dhe të çojë në sepsë nëse nuk trajtohet në kohë. Lajmi i mirë është se pas ndërhyrjes kirurgjikale simptomat tërhiqen”, shton ai.

Diagnoza vendoset me ekzaminim klinik, teste radiologjike dhe biopsi të kolonit. Gjatë kontrollit, barku zakonisht është i fryrë, ndërsa rektumi është bosh. Trajtimi është kirurgjikal dhe përfshin heqjen e segmentit anormal të zorrës së trashë.

BUNA DHE NILI NË DUAR TË SIGURTA TË MJEKUT DR. SIMEONOV

Buna dhe Nili Xhakli nga Kosova janë vëlla e motër që u operuan për këtë sëmundje. Vogëlushja Buna, në moshën vetëm gjashtë muajshe, u pranua në spitalin tonë për trajtim kirurgjikal të segmentit aganglionar të zorrës së trashë.” Disa vite më vonë, edhe vëllai i saj Nil u diagnostikua me të njëjtën sëmundje.

 “Te Buna vendosëm indikacion për operacion dhe u krye resekcion transanal dhe anastomozë e zorrës së trashë. Sot, pas pesë vitesh, Buna është plotësisht mirë dhe zhvillohet normalisht. Te Nili u diagnostikua mungesë totale e aganglionozës kolonike, pra mungesa e qelizave ganglionare në të gjithë zorrën e trashë. U krye operacion me reseksion të zorrës së trashë dhe ileo-ano-anastomozë”, shpjegon dr. Simeonov.

Prindërit janë shumë mirënjohës për përkushtimin dhe profesionalizmin e ekipit mjekësor, duke e cilësuar mjekun si një “superhero” për ndihmën ndaj fëmijëve të tyre.

 “Nuk kemi fjalë për ta falënderuar mjekun. Pas operacionit të Bunës, kur mësuam se edhe Nili do të duhej të kalonte të njëjtin proces, pa asnjë hezitim u përcaktuam sërish për dr. Simeonov. Përvoja jonë pozitive me doktorin dhe spitalin na dha besim të madh”, thonë prindërit.

Para disa muajsh, në Spitalin Klinik “Acibadem Sistina” u krye një operacion jashtëzakonisht i rrallë dhe kompleks te një foshnjë 10-muajshe me sëmundjen Hirschsprung. Doc. dr. Risto Simeonov, kirurgu pediatrik që e realizoi operacionin, thotë se bëhet fjalë për një rast jashtëzakonisht të rrallë.

“Me aplikimin e metodës moderne kirurgjikale transanal pull-through, u hoq me sukses pjesa jofunksionale e zorrës me gjatësi prej 57 centimetrash, që paraqet segmentin më të gjatë të regjistruar deri më tani të operuar me këtë metodë, një rast i rrallë edhe në përmasa botërore”, deklaroi doc. dr. Risto Simeonov.

Kjo ndërhyrje paraqet një sukses të rëndësishëm mjekësor dhe edhe një konfirmim të nivelit të lartë të ekspertizës në kirurgjinë pediatrike maqedonase, si dhe shpresë për një jetë më të mirë dhe më cilësore për pacientët më të vegjël me këtë sëmundje të rrallë.