Me rastin e Ditës Botërore të Fëmijëve të lindur para kohe, Spitali Klinik “Acibadem Sistina” organizoi një takim emocional mes fëmijëve të lindur para kohe, familjeve të tyre dhe ekipit të Kujdesit Neonatal Intensiv, duke shënuar 15-vjetorin e punës së përkushtuar, historive të suksesshme dhe kujdesit më bashkëkohor për pacientët më të vegjël.

Një ditë plot emocione të forta, buzëqeshje, përqafime dhe lot gëzimi. Një ditë kur fëmijët e lindur para kohe, prindërit e tyre, mjekët dhe infermierët u mblodhën sërish bashkë për ta festuar jetën. Fëmijët e lindur para kohe, së bashku me ekipin që ishte kujdesur për ta që nga dita e parë, kaluan përmes një dere të krijuar nga balonat me ngjyrat simbolike të fëmijëve të lindur para kohe – një portë që shënon luftën e përbashkët, shpresën dhe fitoren që nga çastet e para të jetës. Shumë prej këtyre heronjve të vegjël sot janë adoleshentë dhe kanë po aq vite sa edhe vetë përvjetori i Kujdesit Neonatal Intensiv në “Acibadem Sistina”.

 “Sot, Kujdesi Neonatal Intensiv shënon 15-vjetorin e themelimit – kujdesi i parë neonatal privat në rajon. Filluam në mënyrë modeste, vetëm me 3 shtretër intensivë, por me entuziazëm të madh, ndërsa sot jemi një departament me 13 shtretër intensivë. Në spitalin tonë kanë lindur rreth 25.000 foshnja, nga të cilat 13% kanë qenë të lindura para kohe, para javës së 37-të të gestacionit, dhe rreth 10% e tyre kanë pasur nevojë për qëndrim në Kujdesin Intensiv. Secila prej këtyre foshnjave ka historinë e vet dhe është pjesë e familjes sonë të NICU-së,” tha Dr. Simonida Spasevska, shefe e Departamentit të Neonatologjisë.

Në një nga momentet më emocionale të ngjarjes, mjekët i përqafuan pacientët e tyre të vegjël – që sot janë tashmë fëmijë të rritur – një dëshmi e gjallë se kjo betejë ia vlen.

“Ky është një nga momentet më të lumtura në karrierën time – 15 vjet të kaluara në Departamentin e Kujdesit Neonatal Intensiv. Një jubile i rëndësishëm. Ju, fëmijët, jeni frymëzimi ynë më i madh dhe arsyeja pse e duam kaq shumë punën tonë. Do të vazhdojmë edhe më tej me të njëjtën dashuri. Çdo moment, çdo natë pa gjumë, çdo përpjekje e bërë – ia vlejti, duke i parë të gjitha këto buzëqeshje sot,” – deklaroi Prim. Dr. Shk. Dushko Fidanovski, shef i Departamentit të Sëmundjeve të Fëmijëve.

Departamenti i Kujdesit Neonatal Intensiv është vendi ku çdo ditë ndodhin mrekulli. Ekipi i infermiereve, që janë në vijën e parë të kujdesit, me shumë ndjeshmëri dhe përkushtim i shoqërojnë pacientët më të vegjël dhe prindërit e tyre.

“Të jesh infermiere në Departamentin e Kujdesit Neonatal Intensiv do të thotë të kujdesesh për pacientët më të vegjël, por njëkohësisht për luftëtarët më të mëdhenj; të mbash duart më të vogla që bartin forcën më të madhe; të besosh në mrekulli; të ndash gëzimin me prindërit; të mësosh nga foshnjat që simbolizojnë dashuri dhe shpresë. Puna dhe përkushtimi ynë do të vazhdojnë të jenë drita për të gjitha foshnjat e lindura para kohe,” tha Vesna Atanasovska, infermiere kryesore në Departamentin e Pediatrisë.

Rrëfimet dhe përvojat e prindërve ishin shumë të fuqishme; me mirënjohje ata kujtojnë ditët më të vështira dhe më të guximshme të jetës së tyre.

“Askush nuk është i përgatitur të bëhet prind para kohe… të largohet nga spitali me duar bosh… të kthehet në shtëpi dhe të shohë krevatin e zbrazët për foshnjën. Mihaili lindi në javën e 27-të të gestacionit, me peshë vetëm 1 kilogram. Në ato momente më të vështira, shpresën ma dha familja ime, ndërsa ngushëllimi më i madh ishte vetëdija se po e lija Mihailin në duar të sigurta, profesionale dhe të ngrohta. Për plot 46 ditë ai mori kujdes të përkryer mjekësor nga ky ekip. I falënderoj nga zemra secilin prej tyre”, deklaroi Angella Nusheva, nëna e Mihailit.

Me histori të fuqishme, buzëqeshje të sinqerta dhe mirënjohje të madhe, Spitali Klinik “Acibadem Sistina” edhe një herë e konfirmoi përkushtimin e saj: çdo foshnjë meriton një shans, dashuri dhe shpresë – nga frymëmarrja e parë, deri te hapat e parë dhe më tej gjatë gjithë jetës.

Me rastin e këtij dite, spitali prezanton një përfitim të ri në paketat e lindjes – trajtimin dhe trajnimin e parë falas për stimulim senzomotor për foshnjat e lindura para terminit, si mbështetje shtesë për zhvillimin dhe përparimin e tyre.