Me rastin e Ditës Botërore të Goditjes në Tru, në kuadër të projektit të përbashkët edukativ "Zvogëlo rrezikun, rrit sigurinë“, të realizuar në bashkëpunim me SHMUGJ "Pançe Karagjozov“, u ndanë çmime për nxënësit më të suksesshëm, të cilët treguan njohuri dhe përkushtim të veçantë gjatë aktiviteteve të projektit.

Projektin e realizoi Androniki Bibovska, infermiere dhe teknike për edukim dhe trajnime, përmes aktiviteteve praktike dhe edukative në një dhomë spitalore të simuluar. Nxënësit kishin për detyrë të identifikonin parregullsitë dhe lëshimet në kujdesin ndaj pacientit, të dallonin rreziqet e mundshme dhe të propozonin zgjidhje për parandalimin e tyre, me qëllim përmirësimin e sigurisë së pacientëve dhe cilësisë së kujdesit shëndetësor.

Në këtë aktivitet ishte e pranishme edhe Dr. Marija Gashoska, specialiste në neurologji, e cila përshëndeti nxënësit dhe u përcolli mesazhe inkurajuese, duke u dëshiruar shumë sukses në vazhdimin e arsimimit dhe në ndërtimin e karrierës së tyre të ardhshme profesionale.

Një kontribut të veçantë në këtë aktivitet dhanë edhe vetë nxënësit, të cilët mbajtën një ligjëratë edukative mbi goditjen në tru, duke ndarë njohuritë e fituara dhe duke përcjellë mesazhin për rëndësinë e parandalimit dhe reagimit në kohë. Në pjesën praktike, nxënësit, së bashku me Vllatko Ilieski, fizioterapist të diplomuar specialist, demonstruan ushtrime dhe teknika rehabilitimi për pacientët pas goditjes në tru, duke u njohur me rëndësinë e terapisë fizikale në procesin e rikuperimit dhe rikthimit të funksionalitetit.

Ky projekt thekson rëndësinë e edukimit të vazhdueshëm dhe trajnimit praktik të infermierëve për identifikimin në kohë të rreziqeve, reagimin e duhur dhe kujdesin adekuat ndaj pacientëve. Përmes aktiviteteve të tilla, nxënësit kanë mundësi të zgjerojnë njohuritë e tyre, të fitojnë aftësi praktike dhe të përgatiten më mirë për sfidat me të cilat do të përballen gjatë karrierës së tyre profesionale.