Dr. Daniela Poposka, specialiste në onkologji dhe radioterapi në Spitalin Klinik "Acibadem Sistina“, ishte pjesë e tribunës „Tetori Rozë – së bashku për jetën, dashurinë dhe forcën“, kushtuar për rritjen e ndërgjegjësimit për kancerin e gjirit dhe rëndësisë së diagnostikimit dhe trajtimit në kohë.

 

Gjatë ligjëratës së saj, Dr. Poposka foli për simptomat më të shpeshta të kancerit të gjirit, rëndësinë e zbulimit të hershëm të sëmundjes, kontrollet e rregullta parandaluese, si dhe mundësitë bashkëkohore të trajtimit përmes një qasjeje multidisiplinare. Ajo theksoi rëndësinë e identifikimit në kohë të ndryshimeve dhe kujdesit të vazhdueshëm për shëndetin personal.

 

Tribuna u zhvillua në një atmosferë interaktive, me interes të madh nga të pranishmit, të cilët patën mundësinë të bënin pyetje, të ndanin përvojat e tyre dhe të merrnin këshilla profesionale dhe përgjigje nga specialistja.

 

Një kontribut të veçantë në organizimin e aktivitetit dhanë nxënësit e Shkollës së Mesme Komunale „Dimitar Vllahov“, të cilët, përmes punimit të fjongove simbolike rozë dhe pjesëmarrjes aktive, përcollën një mesazh solidariteti, mbështetjeje dhe bashkimi në luftën kundër kancerit të gjirit.