Në Spitalin Klinik “Acibadem Sistina“ për herë të parë është realizuar procedura e adheziolizës epidurale (epidurolizë) tek një pacient me dhimbje të zgjatur në pjesën e poshtme të shpinës, e cila përhapej drejt këmbës. Ndërhyrja u krye nga Doc. Dr. Darko Sazdov, specialist në anesteziologji me mjekim intensiv.

Adhezioliza epidurale është një procedurë moderne, minimalisht invazive, e cila përdoret për trajtimin e dhimbjes kronike në shtyllën kurrizore, veçanërisht kur terapitë e tjera nuk japin rezultate të mjaftueshme. Ajo u ndihmon pacientëve që përballen me dhimbje të vazhdueshme në pjesën e poshtme të shpinës, dhimbje që përhapet përgjatë nervave drejt këmbës, praninë e mbresave dhe ngjitjeve rreth nervave në shtyllën kurrizore, si dhe dhimbje që vazhdon edhe pas ndërhyrjeve kirurgjikale në shtyllën kurrizore.

Gjatë ndërhyrjes, mjeku me ndihmën e një gjilpëre speciale dhe një kateter të hollë hyn në hapësirën epidurale në pjesën e poshtme të shtyllës kurrizore. Me këtë teknikë lirohen ngjitjet rreth nervave dhe aplikohen medikamente drejtpërdrejt në vendin ku shkaktohet dhimbja, me qëllim uljen e inflamacionit dhe presionit mbi nervat. Procedura kaloi pa komplikime, ndërsa kateteri u vendos me sukses në nivelin e nevojshëm të shtyllës kurrizore.

Pas ndërhyrjes pritet ulje e dhimbjes, përmirësim i lëvizshmërisë, nevojë më e vogël për medikamente kundër dhimbjes dhe përmirësim i cilësisë së jetës. Efekti i trajtimit do të ndiqet përmes kontrolleve të rregullta.

Me zbatimin e kësaj procedure, “Acibadem Sistina“ zgjeron spektrin e metodave bashkëkohore për trajtimin e dhimbjes kronike në shtyllën kurrizore, duke u mundësuar pacientëve qasje në terapi të avancuara dhe minimalisht invazive.