Во Клиничката болница „Аџибадем Систина“ се одржа стручен состанок посветен на современите пристапи во онколошкото лекување, на кој учествуваа еминентни специјалисти од болницата „Аџибадем“ во Маслак, проф. д-р Енис Озијар, специјалист по радијациска онкологија и проф. д-р Озлем Ер, специјалист по медицинска онкологија, заедно со онколошкиот тим на „Аџибадем Систина“ – проф. д-р Дева Петрова, д-р Славица Кралева и д-р Даниела Попоска. Присутна беше и д-р Емилија Мирчевска, медицинскиот директор на болницата, како и доктори од Универзитетската клиника за радиотерапија и онкологија – Скопје. 

 

Централна тема на состанокот беше: „Интегрирање на нови системски третмани со радиотерапија кај онколошки пациенти“, која овозможи стручна дискусија за новите терапевтски можности, современите протоколи на лекување и значењето на координираниот пристап во третманот на онколошките пациенти.

 

Посебен акцент беше ставен на размената на знаења, искуства и клинички практики, како и на улогата на мултидисциплинарната соработка во планирањето и спроведувањето на индивидуализиран третман. Интегрирањето на различните терапевтски пристапи овозможува разгледување на најсоодветните опции за секој пациент, во согласност со видот и стадиумот на болеста, како и со неговата општа здравствена состојба.

 

Ваквите стручни средби се значаен дел од континуираното унапредување на медицинската практика, следењето на современите достигнувања во онкологијата и споделувањето знаења што придонесуваат за развој на персонализирани пристапи во лекувањето.