Доц. д-р Александар Ѓорески, специјалист по радиологија и супспецијалист по интервентна радиологија, зеде учество на CIRSE 2026, кој се одржа од 5 до 9 септември во Копенхаген, Данска.

 

Како поканет предавач, д-р Ѓорески ја презентираше темата: „Развојот на интервентната радиологија во Југоисточна Европа“, со осврт на развојот на оваа медицинска дисциплина во регионот, нејзините достигнувања, предизвици и идни перспективи.

 

Д-р Ѓорески е еден од лидерите на интервентната радиологија во Македонија, активен член на CIRSE, основоположник на Македонското здружение и член на Tasc Force групата на CIRSE, која е посветена на развојот и унапредувањето на интервентната радиологија во Југоисточна Европа. Неговото учество како поканет предавач на овој значаен меѓународен конгрес претставува признание за неговата стручност и активниот придонес во развојот на интервентната радиологија, како во земјата, така и во регионот.

 

На овој конгрес се дискутираше за најновите достигнувања во интервентната радиологија и минимално инвазивните процедури со посебен фокус на современиот третман на васкуларни заболувања, аневризми, онколошки заболувања, емболизација, невроинтервенции и комплексни неваскуларни процедури. Беа презентирани и најновите научни сознанија, технологии и техники, со цел подобрување на прецизноста, безбедноста и резултатите од третманот.