Хиршпрунговата болест, позната и како конгенитален мегаколон, претставува вродена состојба, која се карактеризира со проширување на дебелото црево и појава на постојана опстипација. Според доц. д-р Ристо Симеонов, специјалист по детска хирургија, причината за Хиршпрунговата болест не е јасна. Таа настанува кога нервните клетки во дебелото црево не се развиваат целосно. Нервите во дебелото црево ги контролираат контракциите на мускулите што ја придвижуваат храната низ цревата, а без овие контракции столицата се задржува во дебелото црево. 

 

„Постојат неколку фактори што можат да го зголемат ризикот за појава на Хиршпрунговата болест, како што е семејната историја на болеста (таа може да биде наследна и да се пренесува во семејството, па ако едно дете ја има оваа состојба, постои можност и идните деца да бидат изложени на ризик). Болеста се јавува приближно кај едно од 5 000 новородени и е 3-4 пати почеста кај машкиот пол“, објаснува д-р Симеонов.

 

Симптомите може да се појават веднаш по раѓањето или подоцна во детството. Во најраната фаза, алармантни знаци се: изостанок на првата столица (мекониум) во првите 48 часа по раѓањето, одбивање храна, повраќање жолта содржина и надуен стомак.

 

„Во првите денови од животот, најважен знак е ако новороденчето не ја испушти првата столица во првите два дена. Тоа е сигнал што родителите и лекарите не смеат да го игнорираат, бидејќи навремената дијагноза и третман се клучни за успешно лекување и нормален развој на детето“, нагласува доц. д-р Ристо Симеонов.

 

Во раното детство болеста може да се манифестира со заостанување во растот и развојот, хроничен запек, надуен стомак, повраќање или повремени епизоди на тежок пролив. Една од најсериозните компликации е воспаление на цревата, ентероколитис, состојба што може да биде животозагрозувачка.

 

„До 40 % од децата со Хиршпрунгова болест развиваат ентероколитис. Оваа состојба претставува воспаление на тенкото и дебелото црево кај детето. Кај некои деца воспалението е благо, додека кај други се јавуваат тешки симптоми, кои можат да бидат опасни по живот, компликација што може да доведе до сепса доколку не се третира навреме. Добрата вест е дека по хируршката интервенција симптомите се повлекуваат“, вели доц. д-р Симеонов.

 

Дијагнозата се поставува со клинички преглед, радиолошки испитувања и биопсија на колон. При прегледот, стомакот најчесто е надуен, а ректумот е празен. Третманот е хируршки и се состои од отстранување на абнормалниот сегмент од дебелото црево и ректумот.

 

 

Буна и Нил Џакли од Косово се брат и сестра кај кои беа изведени операции за третман на Хиршпрунгова болест. Малечката Буна, на возраст од само шест месеци, беше примена во нашата болница за оперативен третман на аганглионарен сегмент на дебелото црево. Неколку години подоцна, се покажа дека и нејзиното помало братче Нил ја има истата дијагноза, Хиршпрунгова болест.

 

„Кај Буна поставивме индикација за операција и беше направена трансанална ресекција и анастомоза на дебелото црево. Денес, по пет години од интервенцијата, Буна нема никакви проблеми и се развива сосема нормално. Кај нејзиното братче Нил се дијагностицираше состојба на тотална колонична аганглионоза, односно отсуство на ганглиски клетки во целото дебело црево. Направена е ресекција на дебелото црево со илео-ано анастомоза“ – додава д-р Симеонов.

 

Родителите на Буна и Нил велат дека се неизмерно благодарни за посветеноста и професионалноста на целиот медицински тим, а особено на д-р Симеонов. За нив, како што велат, тој е вистински суперхерој, бидејќи токму тој помогнал да се решат здравствените состојби на двете нивни деца.

 

„Немаме зборови со кои би му се заблагодариле. По операцијата на Буна, кога дознавме дека и Нил ќе треба да помине низ ист процес, без двоумење повторно се одлучивме за д-р Симеонов. Нашето позитивно искуство со докторот и болницата ни даде огромна доверба“, велат родителите.

 

 

 

Пред неколку месеци во Клиничката болница „Аџибадем Систина“ беше извршена исклучително ретка и сложена операција кај 10-месечно бебе со Хиршпрунгова болест - вродено заболување на дебелото црево при кое недостасуваат нервни клетки, што оневозможува нормално празнење на цревата и доведува до сериозни здравствени компликации уште во најрана возраст. Доц. д-р Ристо Симеонов, детскиот хирург кој ја изведе операцијата, вели дека станува збор за исклучително редок случај.

 

„Со примена на современата хируршка метода transanal pull-through, успешно беше отстранет нефункционалниот дел од цревото во должина од 57 сантиметри, што претставува најдолг досега забележан сегмент опериран со оваа метода, редок случај дури и во светски рамки“, изјави доц. д-р Ристо Симеонов.

 

Овој зафат претставува значаен медицински успех и уште една потврда за високото ниво на експертиза во македонската детска хирургија, како и надеж за подобар и поквалитетен живот за најмладите пациенти со ова ретко заболување.