Hapat e parë janë një nga momentet më emocionuese në zhvillimin e çdo fëmije, por edhe një periudhë gjatë së cilës prindërit kanë shumë pyetje: Kur është fëmija gati të ngrihet në këmbë? Si mund ta nxisin që të fillojë të ecë? Cilat janë shprehitë që duhet të shmangen?

Në Spitalin Klinik “Acibadem Sistina”, me temën “Hap pas hapi drejt ecjes së pavarur”, u organizua një punëtori në grup, e dedikuar për fëmijët e moshës 10 deri në 18 muaj, të cilët ndodhen në periudhën e përgatitjes për hapat e tyre të parë të pavarur. Përmes ushtrimeve praktike dhe lojës, prindërit mësuan se si ta mbështesin në mënyrën e duhur zhvillimin natyror motorik të fëmijës së tyre: nga zvarritja, te ngritja dhe qëndrimi i qëndrueshëm në këmbë, e deri te ecja e pavarur.

• si të nxitet fëmija që të kalojë nga zvarritja në pozicionin ulur apo në këmbë;
• si të nxitet në mënyrë të sigurt ngritja dhe fillimi i ecjes;
• cilat lëvizje dhe pozicione janë të rëndësishme për zhvillimin e duhur motorik;
• si të stimulohen ekuilibri, koordinimi dhe aftësitë motorike përmes lojës dhe lodrave të përshtatshme;
• cilave shenja dhe shprehive duhet t’u kushtojnë vëmendje prindërit gjatë periudhës kur fëmija fillon të ecë.

Dijana Marinovska, Mr. Sci., magjistre në terapi fizikale në pediatri, e udhëhoqi këtë punëtori dhe, përmes demonstrimeve praktike, u tregoi prindërve se si aktivitetet e përditshme dhe loja mund të bëhen pjesë e rëndësishme e stimulimit të zhvillimit motorik.

Punëtoritë në grup për zhvillimin e foshnjave në “Acibadem Sistina” filluan të realizohen në shtator të vitit 2025 dhe që në fillim zgjuan interes të madh te prindërit e rinj. Qëllimi i tyre është që, përmes edukimit praktik dhe udhëheqjes profesionale, prindërit të fitojnë siguri dhe udhëzime të dobishme për çdo fazë të re të zhvillimit të fëmijës së tyre.