Nga 6 deri më 8 qershor, në Roterdam të Holandës, u mbajt një nga kongreset më prestigjioze botërore në fushën e anesteziologjisë dhe kujdesit intensiv „Euroanaesthesia 2026“, kongresi vjetor i organizuar nga Shoqata Evropiane e Anesteziologjisë dhe Kujdesit Intensiv (ESAIC). Në këtë kongres, i cili çdo vit mbledh mijëra profesionistë shëndetësorë, studiues dhe ekspertë nga më shumë se 100 vende të botës, morën pjesë edhe mjekë nga Spitali Klinik “Acibadem Sistina”.

Në kongres morën pjesë: Prim. Dr. Shk. Beti Kostadinovska-Jordanoska dhe Dr. Aleksandar Radoeshki, specialistë të anesteziologjisë me mjekim intensiv nga Departamenti i Kardiokirurgjisë, si dhe Dr. Vesna Pop-Stefanija-Çorbeva dhe Dr. Azra Kuç, specialiste të anesteziologjisë me mjekim intensiv nga Departamenti i Anesteziologjisë.

Me pjesëmarrje aktive dhe prezantim të punimeve shkencore u veçuan: Prim. Dr. Beti Kostadinovska-Jordanoska dhe Dr. Vesna Pop-Stefanija-Çorbeva, abstraktet e të cilave u pranuan në programin zyrtar shkencor të kongresit.

Prim. Dr. Beti Kostadinovska-Jordanoska prezantoi punimin me titull: “Mbrojtja precize e miokardit: esmololi si strategji selektive beta-1 për parandalimin e dëmtimit ishemik-reperfuziv gjatë bypass-it aortokoronar”, në të cilin trajtohen qasje bashkëkohore për mbrojtjen e muskulit të zemrës gjatë ndërhyrjeve kardiokirurgjikale.

Dr. Vesna Pop-Stefanija-Çorbeva u prezantua me punimin: “Vlerësimi ultrasonografik i indeksit të kolapsibilitetit të venës kava inferiore si parashikues i hipotensionit pas anestezisë spinale gjatë prerjes cezariane”, i kushtuar përmirësimit të sigurisë dhe parashikimit të ndryshimeve hemodinamike te gratë shtatzëna.

Dr. Aleksandar Radoeshki mori pjesë me punimin: “Dëmtimi akut i veshkave pas ndërhyrjes kardiokirurgjikale te pacientët pa anemi dhe pa sëmundje kronike të veshkave: incidenca, faktorët e rrezikut dhe rezultatet afatshkurtra – studim nga një qendër”, i cili analizon rreziqet dhe rezultatet e një prej komplikimeve më të shpeshta pas ndërhyrjeve kardiokirurgjikale.

Pjesëmarrja e mjekëve të “Acibadem Sistina” në këtë ngjarje prestigjioze ndërkombëtare përfaqëson një tjetër dëshmi të përkushtimit të tyre ndaj edukimit të vazhdueshëm, punës kërkimore-shkencore dhe ndjekjes së arritjeve më të reja në anesteziologjinë dhe mjekësinë intensive bashkëkohore.