Në Spitalin Klinik “Acibadem Sistina” u mbajt një takim profesional në të cilin u prezantuan udhëzimet dhe dëshmitë më të reja bashkëkohore për trajtimin invaziv të sëmundjes kronike stabile koronare. Prezantimin e mbajti Dr. Milan Milojeviq, konsulent për cilësi dhe kontroll të cilësisë (QI/QA) në spital, i cili prezantoi rekomandimet më të fundit të bazuara në hulumtime moderne mjekësore dhe studime klinike.

Në fokus të prezantimit ishte zgjedhja e trajtimit më të përshtatshëm për pacientët me sëmundje kronike dhe komplekse koronare – ndërmjet procedurës PCI (vendosja e stentit) dhe kirurgjisë CABG (operacion bypass). Me këtë rast u analizuan rezultatet e studimeve të mëdha ndërkombëtare EXCEL dhe NOBLE, të cilat tregojnë se gjatë marrjes së vendimit për trajtim rëndësi të veçantë kanë rezultatet afatgjata, si mbijetesa, rreziku nga infarkti i zemrës dhe nevoja për ndërhyrje të përsëritur.

U theksua se qasja bashkëkohore në trajtimin e sëmundjes koronare nënkupton vlerësim multidisiplinar, ku vendimi për trajtimin duhet të merret nga një ekip i përbërë nga kardiologë dhe kardiokirurgë, me qëllim që çdo pacient të marrë trajtim të individualizuar dhe më të përshtatshëm.

Theks i veçantë iu kushtua edhe parandalimit sekondar pas intervenimit, që nënkupton terapi të rregullt, kontroll të faktorëve të rrezikut dhe ndryshim të stilit të jetesës.

Me ndjekje dhe implementim të vazhdueshëm të rekomandimeve më të reja mjekësore botërore, “Acibadem Sistina” vazhdon të sigurojë trajtim bashkëkohor, të sigurt dhe me cilësi të lartë për pacientët me sëmundje kardiovaskulare.