Në prag të muajit të infermierëve, në qendrën simuluese të KB “Acibadem Sistina“ ka filluar realizimi i ushtrimit simulues “UL RREZIKUN – RRIT SIGURINË (RISK DOWN – SAFETY UP)“.

Bashkëpunimi i përbashkët, i iniciuar nga kryeinfermierja e spitalit Biljana Dilevska dhe Dr. Vesna Atanasovska – ndihmëse drejtoreshë në SHMMQSH „Dr. Pançe Karagjozov“, u prit pozitivisht si nga punonjësit e spitalit ashtu edhe nga instruktoret në shkollë.

Simulimi është dizajnuar posaçërisht për nevojat e nxënësve të vitit të tretë, drejtimi infermierë/teknikë mjekësorë, dhe për nevojat e tyre në identifikimin e rreziqeve bazë në një dhomë spitalore. Qëllimi është që nxënësit gjatë praktikës së tyre në spitale të rrisin perceptimin për identifikimin e gabimeve dhe rreziqeve, si dhe të sigurojnë sigurinë e pacientëve gjatë qëndrimit në spital. Gjatë projektit do të vlerësohen edhe njohuritë për higjienën e duarve, terapinë e pacientëve dhe kujdesin ndaj të sëmurit.

Gjatë disa termineve, 162 nxënës nga 5 paralele të ndryshme, nën udhëheqjen e infermieres për edukim dhe trajnime Androniki Bibovska dhe supervizorëve Magdalena Mitevska, Jelena Zllatiq Stoilov dhe Robert Eftimovski, me ndihmën e instruktoreve nga shkolla, do të realizojnë trajnime të përshtatura sipas moshës, njohurive dhe programit arsimor të nxënësve.

Theksi kryesor është mbi mundësimin që nxënësit të zhvillojnë reagime të duhura gjatë shkollimit të tyre dhe afrimin me standardet e larta të kujdesit ndaj pacientëve, në përputhje me standardet e trajtimit dhe kujdesit sipas të cilave punon KB “Acibadem Sistina“.

Çdo nxënës do të vlerësohet sipas pikëve të përcaktuara dhe në fund të ushtrimit simulues, nxënësit më të mirë do të marrin mirënjohje dhe shpërblime për përkushtimin dhe suksesin e treguar.

KB „Acibadem Sistina“ është një spital që është gjithmonë i hapur për bashkëpunim me institucione që kontribuojnë në ruajtjen dhe përmirësimin e shëndetit, veçanërisht me institucione, misioni i të cilave është arsimi, shkenca dhe rritja e njohurive.