Фармацевтите од Клиничката болница „Аџибадем Систина“ континуирано ја унапредуваат својата професионална експертиза преку активно учество на стручни конгреси и едукативни работилници, придонесувајќи за развојот на современата болничка и клиничка фармација.

Од 1 до 4 октомври 2026 година, во Охрид се одржа 8. Конгрес на фармацевтите во Северна Македонија со меѓународно учество, на кој м-р фарм. Оливера Спасовска, специјалист по клиничка фармација, го презентираше својот труд на тема „Влијанието на интервенциите на клиничкиот фармацевт врз оптимизацијата и безбедноста на терапијата кај критично болни пациенти“. Во презентацијата беше истакната значајната улога на клиничкиот фармацевт во оптимизацијата на терапијата и унапредувањето на безбедноста на пациентите во единиците за интензивна нега.

На 14. Работилница на болничките фармацевти на Република Северна Македонија, која се одржа од 30 октомври до 1 ноември 2026 година во Крушево, м-р фарм. Звездана Димовска Сарџовска ја презентираше темата „Организација на работата на болничката аптека и терапија по пациент“. Посебен акцент беше ставен на значењето на ефикасната организација на болничката аптека и индивидуализираниот пристап кон терапијата, во согласност со меѓународните стандарди на JCI за квалитет и безбедност. Во овој контекст, Клиничката болница „Аџибадем Систина“ претставува пример за современа и напредна организација на болничко-фармацевтската дејност во нашата земја.

М-р фарм. Ленче Ангеловска ја презентираше темата „Од проценка на знаење до континуирана фармацевтска грижа“, нагласувајќи ја важноста на едукацијата и континуираната фармацевтска поддршка на пациентите со механички срцеви валвули кои примаат доживотна орална антикоагулантна терапија, со цел постигнување подобра терапевтска контрола и обезбедување побезбеден и поквалитетен живот.

Со ваквите стручни активности, Клиничката болница „Аџибадем Систина“ ја потврдува својата посветеност на континуираниот професионален развој, унапредувањето на фармацевтската практика и обезбедувањето квалитетна и безбедна здравствена грижа за пациентите.