Нашите специјалисти по гинекологија и акушерство, д-р Бобан Сарџовски и д-р Јосиф Ѓорески, успешно ја завршија тренинг- програмата за примена на роботска технологија во гинеколошката хирургија. Обуката се одржа во TOUMAI®️ Центарот за обука по роботска хирургија, развиен во соработка со MicroPort во рамки на Универзитетот Аџибадем, Истанбул, Турција.

Роботската хирургија претставува една од најсовремените технологии во медицината и значаен напредок во изведувањето на гинеколошките интервенции. Оваа технологија се применува при третман на различни состојби, вклучително миоми, ендометриоза, комплетен третман на малигна патологија и други комплексни заболувања. Благодарение на високата прецизност на роботските инструменти и напредната 3D визуелизација, хирурзите можат да изведуваат процедури со поголема сигурност, контрола и точност.

За пациентите, роботската хирургија овозможува помала болка, помал ризик од компликации, минимални резови, пократок престој во болница и значително побрзо закрепнување.

Континуираната едукација и професионалното усовршување на медицинскиот кадар се дел од заложбата на „Аџибадем Систина“ за примена на најновите светски медицински достигнувања и обезбедување врвна здравствена грижа за пациентите. Со воведувањето на роботската технологија, болницата ќе овозможи пристап до најсовремени медицински третмани, кои досега беа достапни само во најразвиените медицински центри во светот.