Во организација на Клиничката болница „Аџибадем Систина“ се одржа стручна оториноларинголошка секција на тема „Современи клинички предизвици и иновации во оториноларингологијата“. Настанот беше акредитиран од страна на Лекарската комора и на него присуствуваа голем број здравствени професионалци, кои разменија знаења, современи пристапи и клинички искуства од областа на оториноларингологијата и сродните дисциплини. На почетокот на стручниот состанок поздравен говор имаше д-р Емилија Мирчевска, медицински директор, а со со свои предавања се претставија доктори од болницата, обработувајќи актуелни и значајни теми:

• Д-р Македонка Гарванлиева Николова, специјалист по оториноларингологија, одржа предавање на тема „Кога увото крие повеќе од очекуваното – интересни отолошки случаи“, при што презентираше комплексни клинички примери и дијагностички предизвици од секојдневната пракса.
• Доц. д-р Миленко Костов, специјалист по неврохирургија, говореше на тема „Невронавигација во хирургија на база на череп: зголемување на хируршката безбедност и прецизност“, истакнувајќи ја важноста на современите технологии за унапредување на хируршките резултати.
• Д-р Тијана Јорданова, доктор по општа медицина и специјализант по оториноларингологија, се осврна на темата „Улогата на нутритивната поддршка по тонзилектомија кај деца“, потенцирајќи ја значајноста на правилната исхрана во постоперативниот период.

По завршувањето на предавањата се отвори плодна дискусија, во која присутните активно учествуваа, разменувајќи мислења, искуства и професионални ставови. Настанот претставува значаен придонес кон континуираната медицинска едукација и унапредувањето на клиничката пракса во областа на оториноларингологијата.