На 17 ноември, со почеток во 18 часот, во амфитеатарот на Клиничката болница „Аџибадем Систина“ ќе се одржи едукативно предавање посветено на дијабетесот тип 1 и тип 2, на кое специјалисти од областа на ендокринологијата и нутрицијата ќе споделат стручни информации и практични совети за подобро разбирање и справување со оваа состојба.

Предавачи на настанот ќе бидат ендокринолозите проф. д-р Татјана Миленковиќ, проф. д-р Гордана Пемовска, д-р Надица Божиновска-Димова и д-р Горан Петровски, како и нутриционистката Ана Антовска.

Едукативното предавање е бесплатно и е наменето за сите што сакаат да дознаат повеќе за дијабетесот, без разлика дали живеат со оваа состојба, имаат близок со дијабетес или едноставно сакаат подобро да го разберат значењето на превенцијата и грижата за здравјето. За присуство на настанот задолжителна е претходна најава на телефонскиот број 02/30 99 500.

• Дијабетес тип 1 и тип 2: Кои се основните разлики, како настануваат двата типа дијабетес и кои се нивните специфичности.
• Симптоми и навремена дијагноза: Кои знаци треба да се препознаат, кои анализи се користат за поставување дијагноза и зошто е важно навременото откривање.
• Современи можности за лекување: Кои се актуелните терапевтски пристапи и зошто третманот се приспособува на потребите на секој пациент.
• Контрола на гликозата во крвта: Зошто е важно редовното следење на вредностите и како нивната контрола придонесува за долгорочното здравје.
• Исхрана и дијабетес: Како да се избираат соодветни намирници, да се планираат оброците и да се разбере влијанието на храната врз нивото на гликоза во крвта.
• Физичка активност и животни навики: Како движењето, сонот и секојдневните навики можат да помогнат во подобрата контрола на болеста.
• Превенција на компликации: Кои се важните контролни прегледи и зошто континуираната грижа е составен дел од лекувањето.