М-р д-р Александар Бојаџиев, специјалист по гинекологија и акушерство, беше дел од едукативната програма на настанот „Bring Your Best Friend“, кој годинава се одржа на 26 и 27 септември во Маврово.

Д-р Бојаџиев го одржа предавањето „Четири годишни времиња на жената – хормоните низ животниот циклус“, во кое, преку стручен но разбирлив пристап, го претстави животниот циклус на жената и промените што го следат во различните животни периоди.

Предавањето ги опфати фазите од созревањето, преку љубовта, сексуалноста и партнерството, до бременоста и мајчинството, како и периодот на перименопауза, менопауза и зрелата возраст. Посебен акцент беше ставен на улогата на хормоните и на начинот на кој нивните природни промени се одразуваат врз физичкото и емоционалното здравје на жената.

Преку симболиката на четирите годишни времиња, д-р Бојаџиев на едноставен и близок начин ја претстави комплексната поврзаност меѓу хормоналните промени и различните фази од животот на жената, потенцирајќи го значењето на информираноста, навремената грижа за сопственото здравје и редовните гинеколошки прегледи во секоја животна доба.