Во атмосфера исполнета со радост и детска креативност, децата со типичен и атипичен развој заедно изработуваа мали светулки, давајќи им живот преку боите, изразите и емоциите. Преку игра и уметност, малите уметници имаа можност слободно да ја изразат својата фантазија, да ги препознаат и претстават своите чувства и да го откријат богатството на различностите. Со креативниот пристап, топлината и трпението на Олимпија Камчева-Стојческа и посветената грижа и стручна поддршка на м-р Соња Јордановска-Цацаноска, беше создаден простор во кој секое дете можеше да се почувствува прифатено, охрабрено и инспирирано да твори. Секоја светулка раскажа своја приказна, секоја насмевка донесе нова радост, а секоја прегратка потсети дека најубавите нешта се создаваат кога сме заедно.

 

„Море од светлини“ беше многу повеќе од ликовна работилница. Беше место каде што различностите станаа наша заедничка сила, а уметноста - јазик што сите го разбираме. Место каде што секое дете имаше можност да блесне на свој начин и да остави свој мал, но значаен светол траг. Затоа што инклузивната иднина ја создаваме заедно, со разбирање, прифаќање и љубов. А понекогаш, за да го осветлиме светот, доволна е само една мала светулка.