Од 17 до 19 април 2026 година во Скопје се одржа III конгрес на Македонското здружение за анестезија, реанимација и интензивна нега (МЗМСАРИН), со меѓународно учество. Во рамки на конгресот беа презентирани 30 стручни предавања, презентации, работилница и стручна панел-дискусија.

Одговорната сестра на Одделот за анестезија, реанимација и интензивно лекување при КБ „Аџибадем Систина“, дипл. мед. сестра Марина Николоска, како и дипл. мед. сестра – специјалист анестетичар Андроники Бибовска, беа дел од Организацискиот и Стручниот одбор, додека 12 медицински сестри и техничари присуствуваа како слушатели.

Медицинската сестра за едукации и тренинзи, дипл. мед. сестра – специјалист анестетичар Андроники Бибовска, беше презентер на темата „Почетоците на употребата на вештачка интелигенција во едукацијата на медицинските сестри во Македонија – апликација Coach“. Станува збор за апликација која болницата ја користи за подобрување на знаењата на медицинските сестри и унапредување на работните процеси. Апликацијата е специјално креирана за потребите на болницата и е единствена во регионот. Темата предизвика голем интерес, бидејќи дел од апликацијата користи вештачка интелигенција и претставува пионерски чекор во едукацијата на медицинските сестри.

Како гостин предавач на конгресот се претстави и доц. д-р Дарко Саздов, специјалист по анестезија, реанимација и интензивно лекување, со темата „Пишување и објавување трудови во сестринската пракса“, која е особено актуелна и бара соодветна подготвеност и вештини.

Во продолжение беше организирана и панел-дискусија на истата тема, каде што Андроники Бибовска како модератор придонесе за квалитетна дебата меѓу еминентни доктори и медицински сестри од областа на анестезиологијата, реанимацијата и интензивното лекување.

Клиничката болница „Аџибадем Систина“ е болница во која медицинските сестри и докторите заеднички изработуваат и објавуваат стручни трудови, што претставува показател за посветеноста и подготвеноста на институцијата да овозможи континуиран професионален развој и унапредување на академското усовршување на вработените.